काठमाडौँ । गत पुस अन्तिम सातादेखि उत्कर्षमा पुगेको नेपाली कांग्रेसको आन्तरिक विवाद अहिलेसम्म साम्य भएको छैन । गत पुस २७ देखि ३० गतेसम्म तत्कालीन सभापति शेरबहादुर देउवा र नेता डा. शेखर कोइरालाको असहमतिका बिच तत्कालीन महामन्त्रीद्वय गगन थापा र विश्वप्रकाश शर्माले विशेष महाधिवेशन आयोजना गरेपछि पार्टीभित्रको विवाद उत्कर्षमा पुगेको थियो ।
विशेष महाधिवेशनले थापालाई सभापति, शर्मालाई उपसभापतिसहित नयाँ कार्यसमिति चयन गरेपछि दुई समूहका शीर्ष नेताबिच संवादहिनताको अवस्था छ ।
विशेष महाधिवेशनलाई माघ २ गते निर्वाचन आयोगले आधिकारिकता प्रदान गरेपछि देउवा–कोइराला समूह आफूहरूले आधिकारिकता पाउनुपर्ने माग गर्दै सर्वोच्च अदालतमा पुगेको छ । उनीहरूले दायर गरेको रिट सर्वोच्च अदालतमा अझै विचाराधीन छ ।
