सरकारले उखुमा दिँदै आएको अनुदान रकम प्रतिक्विन्टल ७० रुपैयाँबाट आधा घटाएर ३५ रुपैयाँमा झारेपछि तराई–मधेशका सयौं किसानहरूले काठमाडौंमा प्रदर्शन गरेका छन्। उखु उत्पादक महासंघको नेतृत्वमा आन्दोलित किसानहरूले पुरानै दरमा अनुदान तत्काल भुक्तानी गर्न माग गरेका छन्।
आइतबार गौशालाबाट सुरु भएको किसानहरूको नारा–जुलुस माइतीघर मण्डला हुँदै बानेश्वर चोकमा पुगेको थियो। प्रदर्शनमा सिराहा, सर्लाही, नवलपरासी लगायतका जिल्लाबाट आएका किसानहरूको सहभागिता रहेको छ।
यस वर्ष किसानहरूले बिक्री गरेको २ करोड १५ लाख क्विन्टल उखुको अनुदानबापत सरकारले करिब १ अर्ब ६० करोड रुपैयाँ भुक्तानी गर्न बाँकी छ। कृषि मन्त्रालयले पुरानै दरमा अनुदान दिन प्रस्ताव गरे पनि मन्त्रिपरिषद्ले बजेट अभाव देखाउँदै अनुदान कटौती गर्ने निर्णय गरेको थियो, जसलाई किसानहरूले अस्वीकार गरेका छन्।
