५८ ट्याब्लेट ट्रामाडोलसहित सूर्यविनायकबाट ३१ वर्षीय युवक पक्राउ

प्रहरीले भक्तपुरको सूर्यविनायकमा लागूऔषधविरुद्धको कारबाहीका क्रममा एक युवकलाई पक्राउ गरेको छ । सूर्यविनायक नगरपालिका–९ नंखेल बस्ने ३१ वर्षीय राजेश वनमालालाई सोमबार बिहान प्रहरीले नियन्त्रणमा लिएको हो ।
प्रहरी वृत्त जगातीको टोलीले शंकास्पद अवस्थामा फेला पारेका वनमालाको खानतलासी गर्दा ५८ ट्याब्लेट नियन्त्रित लागूऔषध ट्रामाडोल बरामद गरेको थियो । पछिल्लो समय प्रतिबन्धित औषधिको अवैध कारोबार बढ्दै गएको सूचनाका आधारमा प्रहरीले निगरानी बढाएको छ ।
पक्राउ परेका वनमालालाई नियन्त्रणमा राखी लागूऔषध नियन्त्रण ऐन बमोजिम थप अनुसन्धान अघि बढाइएको प्रहरीले जनाएको छ ।