पौष ०५, २०८१ शुक्रबार
काठमाण्डौ
डोमिनिक पेलिकोट, ७२, आफ्नो तत्कालीन पत्नी गिजेल पेलिकोटमाथि बलात्कार र मादक पदार्थ खुवाएको आरोपमा दोषी ठहरिएका छन्। बिहीबार फ्रान्सलाई हल्लाएको र विश्वलाई झस्काएको यस ठूलो मुद्दामा उनलाई २० वर्षको अधिकतम सजाय सुनाइएको छ।
डोमिनिक पेलिकोट र उनका ५० सह-अभियुक्तहरू सबै दोषी ठहरिएका छन्, जसमा एउटा बाहेक सबैमाथि बलात्कारको आरोप थियो। सह-अभियुक्तहरूलाई बिहीबार तीन देखि १५ वर्षको सजाय तोकिएको छ।
फैसलापछि गिजेल पेलिकोटले — जसले मुद्दामा गुमनाम नरहने निर्णय गरिन् — अविनिओनस्थित अदालतमा पत्रकारहरूसँग भावुक वक्तव्य दिइन्। उनले आफ्ना नातिनातिनाको बारेमा बोल्दै उनीहरू “भविष्य” भएको र यो “संघर्ष” उनीहरूको लागि गरेको बताइन्। उनले आफ्नो तीन छोराछोरी मुद्दाको अन्त्यसम्म आफ्नो मनमा उच्च स्थानमा रहेको उल्लेख गरिन्।
उनी आफ्नो मुद्दाको क्रममा भएको गहिरो भावनाको बारेमा बोलिन् र सबै यौन दुर्व्यवहारका पीडितहरूको समर्थन व्यक्त गरिन्, भनीन्, “हामी एउटै लडाईमा छौँ।” गिजेलले मुद्दाको दौरान आफूलाई समर्थन गर्ने सबैलाई “गहिरो आभार” व्यक्त गरिन्।
सुनुवाई सेप्टेम्बर २ मा सुरु भएको थियो। करिब तीन महिना लामो सुनुवाईमा गिजेल पेलिकोट आफैंले पनि बयान दिएकी थिइन्। उनी फ्रान्स र विश्वभर नारीवादी प्रतीक बनिसकेकी छन्।
अभियोजन पक्षले डोमिनिक पेलिकोटलाई २० वर्षको अधिकतम सजाय र अधिकांश सह-अभियुक्तलाई १० वर्ष वा सोभन्दा बढी सजायको माग गरेका थिए। डोमिनिक पेलिकोटले आफ्ना परिवारलाई “आफ्नो क्षमा स्वीकार गर्न” आग्रह गरेका थिए।
डोमिनिक पेलिकोटले अदालतमा बयान दिए कि उनले गिजेल पेलिकोटको खाना र पेय पदार्थमा निन्द्रा लाग्ने औषधि मिलाएर उनलाई बलात्कार गर्ने गरेको र अनलाइन च्याट फोरममार्फत कम्तीमा ५० अन्य पुरुषहरूलाई परिवारको घरमा बोलाएर गिजेल पेलिकोटमाथि बलात्कार र यौन दुर्व्यवहार गर्न लगाएको बताएका थिए। अदालतमा उनले आफ्नो आरोपहरूलाई स्वीकार गरेका थिए।
पीडितको तर्फबाट उनी गुमनाम रहन अस्वीकार गर्दै अदालतमा भनिन्, “यो लाज हाम्रो होइन — यो उनीहरूको हो,” र अन्य बलात्कार पीडित महिलाहरूलाई आफ्नो आवाज उठाउन प्रेरणा दिन चाहेको बताइन्।
(एबिसी न्युज, न्युयोर्कबाट साभार)
