राष्ट्रिय परीक्षा बोर्डले कक्षा १२ को वार्षिक परीक्षाको नतिजा सोमबार साँझ सार्वजनिक गरेको छ । यस वर्षको परीक्षामा ६१.१७ प्रतिशत विद्यार्थी उत्तीर्ण भएका छन् ।
बोर्डका अनुसार, परीक्षामा सहभागीमध्ये ३८.८३ प्रतिशत विद्यार्थीको नतिजा ‘नन-ग्रेडेड’ (एनजी) आएको छ, जसको अर्थ उनीहरूले माथिल्लो कक्षामा भर्ना हुनका लागि आवश्यक ग्रेड प्राप्त गर्न सकेनन् ।
गत वैशाख २१ गतेदेखि सञ्चालन भएको परीक्षामा देशभरका ५,२०२ विद्यालयबाट कुल ५ लाख ११ हजार ५२५ जना परीक्षार्थीले सहभागिता जनाएका थिए । यसमा नियमिततर्फ ३ लाख ९५ हजार ९०८ जना र आंशिकतर्फ १ लाख १५ हजार ६१७ जना परीक्षार्थी थिए । बोर्डले नतिजा सार्वजनिक गरेसँगै विद्यार्थीहरूले अब विभिन्न विश्वविद्यालयमा स्नातक तहको भर्नाका लागि प्रक्रिया सुरु गर्नेछन् ।
